සිංහල බ්ලොග්කරුවන්ගේ සංසදයෙන් ටීෂර්ට් එකක් මුද්‍රණය කරන වැඩේ පටන් ගත්තේ මීට මාසෙකටත් කලින්. මේ ගැන යෝජනාව ආපු වෙලාවේ සෑහෙන්න පිරිසක් ඒක අනුමත කලාට මොකද අන්තිමේ ටීෂර්ට් සඳහා මුදල් ගෙවා වෙන් කරගෙන තිබුනේ සුලු පිරිසක් තමයි.

ඒ අය දන්නවා ඇති ටීෂර්ට් මුද්‍රණයට ගොඩක් බාධා එල්ල උනා. එක වරක් ටීෂර්ට් එකේ අකුරු පේලියක් අදාල ආයතනයෙන් වැරදියට මුද්‍රණය කරලා ෂර්ට් තොගයම නැවත මුද්‍රණය කරන්න සිදුවුනා. ඔවුන් පොරොන්දු වූ දිනට ෂර්ට් තොගය ලබා දුන්නේ නැහැ.

මේ ආකාරයේ අනේක විධ බාධා වලින් පසුව අවසානයේ ඔන්න ටී ෂර්ට් තොගය ඔබ වෙත ලබා දීමට සූදානම්. විශේෂයෙන් කියන්න ඕනේ, අප විසින් මුද්‍රණය කරනු ලැබුවේ කලින් මුදල් ගෙවා ඕඩර් කල අය සඳහා පමණයි. අමතර ටීෂර්ට් මුද්‍රණය කර නැති නිසා කලින් මුදල් ගෙවා ඕඩර් නොකල කිසිවෙකුට ටීෂර්ට් ලබාගැනීමට බැහැ.

ඔබේ ටීෂර්ට් එක මැයි 23 සඳුදා සිට පහත ආකාර වලින් ලබාගත හැකියි..

පැමිණ ලබාගැනීමට කැමති අයට, Metatechno Lanka (Pvt) Ltd, No 28, West Tower, World Trade Center, Colombo 1 ලිපිනයට පැමිණ කාලිංග හමුවීමෙන් ඔබේ ටීෂර්ට් එක ලබාගත හැකියි. පැමිණීමට ප්‍රථම  0777254174 අංකයෙන් කාලිංග අමතා ඔබ පැමිණෙන බව දැන්වීමට කාරුණික වන්න. ඔබේ අනන්‍යතාවය තහවුරු කිරීම සඳහා
1. ඔබ විසින් ටීෂර්ටය සඳහා බැංකුවට මුදල් ගෙවූ ලදුපත
හෝ
2. ඔබේ ජාතික හැඳුනුම්පත
ඉදිරිපත් කිරීමට අමතක කරන්න එපා.

තැපෑලෙන් ලබාගැනීමටත් අවකාශ තිබෙනවා. ඒ සඳහා වැයවන ගාස්තු අදාල කූරියර් සේවාවෙන් (CityPack) අප වෙත ලබාදී ඇති මේ ලේඛණයේ සඳහන්. එසේ තැපෑලෙන් ලබාගැනීමට අවශ්‍ය නම් එය සූදානම් කරගැනීම සඳහා 0777254174 අංකයෙන් කාලිංග අමතන්න.

සතුටුදායක ආරංචිය තමයි, ඔවුන් අතින් සිදුවූ ප්‍රමාදයට හිලවු වශයෙන් ඔවුන් ටීෂර්ට් එකක් රු 600/= මිලකට ලබාදීමට එකඟවුනා. මේ අනුව ඔබ ගෙවූ මුදලින් ඉතිරි වූ මුදලත් ඔබේ ටීෂර්ටය සමගින්ම ලබාගත හැකියි.

ටීෂර්ට් එකට මුදල් ගෙවා ඇත්තේ මෙන්න මේ අයයි (එනම් ටීෂර්ට් ලබාගත හැක්කේ මෙන්න මේ අයටයි)

1. චන්දික ගුණතිලක
2. තිලිණ ගුණසේකර
3. චතුර වික්‍රමසිංහ
4. ඉසුරු කොඩිතුවක්කු
5. අසිත කුමාර ලියනවඩුගේ
6. නදීන්ද්‍ර මදනායක
7. චින්තක සඳරුවන්
8. ප්‍රබෝධ මධුෂාන්
9. ගීත් නුවන් පතිරණ
10. ගනිදු රූපසේන
11. රුක්ෂාන් සමීර
12. යසිත් මියුරංග
13. රනිල් අල්ගම
14. රජිත අනුරාධ
15. ධනුෂ්ක ගුණසිංහ
16. ප්‍රවීන් ඉන්ද්‍රනාම
17. බින්දුක විජයනායක
18. නෙවින්දරී ප්‍රේමරත්න
19. කණිෂ්ක හෙන්නායක
20. සහන් සිරිබන්ධු
21. ගයන්ත සමරදිවාකර
22. හර්ෂණී නාකන්දල
23. අනුරාධ ජයතිලක
24. සුබාෂ් ප්‍රියංකර
25. තරිඳු පමල් දර්ශන
26. හර්ෂණ වීරසිංහ
27. ඉෂාන් තිලිණ

පසුගිය වසරේ සුහද හමුව හා සමගාමීව ටී-ෂර්ටයක් මුද්‍රණය කලා මෙන්ම මෙවරද බොහෝ දෙනෙකුගේ ඉල්ලීම පරිදි ටීෂර්ට් එකක් නිර්මාණය කිරීමට අප කල්පනා කලා. මෙම ටීෂර්ට් එක කලින් මුද්‍රණය කර මිලදී ගැනීමක් ලෙස ඔබ වෙත ලබාදිය නොහැකි නිසා අප තීරණය කලේ ටීෂර්ට් අවශ්‍ය අයට කලින් මුදල් ලබා දී ඇණවුම් කිරීමක් සිදු කල විට ජනවාරි 20 දක්වා ඇණවුම් කර ඇති ටීෂර්ට් ප්‍රමාණය මුද්‍රණය කර ඔවුන්ට ලබාදීමටයි.

මේ නිසා ඔබට ටීෂර්ට් එකක් අවශ්‍ය නම් ඔබ කල යුත්තේ 2011 ජනවාරි 20ට පෙර මෙහි පහත සඳහන් වන පරිද්දෙන් අදාල ගෙවීම සිදුකර, ඒ බැව් අප වෙත දැනුම් දීමයි. ඔබේ ටීෂර්ට් එක සූදානම් වූ විගස ඒ බව අප විසින් ඔබට දැනුම් දෙනවා ඇති.

එක් ටීෂර්ට් එකක් සඳහා මිල රු 750/= ක් වන අතර ඔබට කැමති ටීෂර්ට් සංඛ්‍යාවක් මිලදීගත හැකියි. ඔබේ ගෙවීම් සම්පත් බැංකුවේ 001259000218 අංකය දරණ කාලිංග ඇතුලත්මුදලි නමට ඇති ගිණුමට බැර කල යුතු අතර ඔබේ ගෙවීමේ විස්තර admin@sinhalabloggers.com වෙත විද්‍යුත් ලිපියකින් දැන්විය යුතුයි. මෙසේ අප වෙත දන්වා එවිය යුත්තේ ගෙවීම සිදුකල දිනය හා වේලාව, බැංකු ශාඛාව හා ගණුදෙනුව වෙනුවෙන් ලැබුනු Reference number එකයි. (මෙම reference number එක ඔබේ deposit slip එකේ සටහන් වන අතර අවශ්‍ය නම් එවෙලේම බැංකු නිලධාරියාගෙන් විමසීමෙන් දැනගත හැකියි)

ගෙවීම් විස්තරය සමග ඔබට අවශ්‍ය ටීෂර්ට් ගණන (මෙම ගණනට සරිලන ලෙස ගෙවීම් සිදුකර තිබිය යුතුය), ටීෂර්ට් වල ප්‍රමාණය (Small, Medium, Large, XL) ද සඳහන් කර එවීමට අමතක කරන්න එපා.

මෙසේ එවනු ලැබූ විද්‍යුත් ලිපිය අප වෙත ලැබුනු පසු ගණුදෙනුව පරීක්ෂා කර බලා ඒ බැව් පිලිතුරු ලිපියකින් අප විසින් සනාථ කරනු ඇති.

ටීෂර්ට් මුද්‍රණය කල පසු ඒ බැව් ඔබ වෙත දැනුම් දෙනු ලබන අතර, කොළඹ නගරයේ අප විසින් සඳහන් කරනු ලබන ස්ථානයකට පැමිණ ඔබගේ deposit slip එක හෝ ජාතික හැඳුනුම්පත ඉදිරිපත් කර අනන්‍යතාවය තහවුරු කිරීමෙන් එය ලබාගත හැකියි. පිටපලාතක් හෝ විදේශයක් වෙත තැපෑලෙන් එවාගැනීමට අවශ්‍ය නම් ඒ සඳහා තැපැල් ගාස්තු වෙනමම ගෙවිය යුතු අතර ඒ පිලිබඳව අප වෙත ඊමේල් එකක් එවීමෙන් සාකච්ඡා කරගත හැක.

පසුගිය වතාවේ නිර්මිත ටීෂර්ට් එකේ ඡායාරූපයක් පහත දැක්වෙන අතර මෙවරද ඊට සමාන ආකෘතියකින්, නමුත් වෙනස් Material එකකින් ටීෂර්ට් එක මුද්‍රණය වනු ඇත. පසුගිය වතාවේ මෙන් තම බ්ලොග් අඩවියේ ලිපිනය ෂර්ට් එකේ සටහන් කරවාගැනීමට නම් මෙවර පහසුකම් නැති බව කණගාටුවෙන් දැනුම් දෙන්නට සිදුවෙනවා.

එසේනම් සමස්තයක් ලෙස ටීෂර්ට් එක ලබාගැනීමට ඔබ විසින් කල යුතු දේ සාරාංශගත කොට මෙසේ දැක්විය හැකියි.

1. සම්පත් බැංකුවේ අංක 001259000218 දරණ කාලිංග ඇතුලත්මුදලි නමට ඇති ගිණුමට, එක් ටීෂර්ටයක් සඳහා රු 750/= වන සේ අවශ්‍ය ටීෂර්ට් ගණනට අදාල මුදල් ප්‍රමාණය 2011 ජනවාරි 20 ට පෙර තැන්පත් කිරීම.
2. ගණුදෙනුවේ reference number එක, ගණුදෙනුව සිදුකල බැංකු ශාඛාව, ගණුදෙනුව සිදුකල දිනය හා වේලාව යන විස්තර සමග ඔබේ නම සඳහන් කර 2011 ජනවාරි 20 ට පෙර admin@sinhalabloggers.com වෙත ඊමේල් එකක් එවීම.
3. ඔබේ ඊමේල් එක ලැබුනු බවට හා ගණුදෙනුව verify කල බවට අප වෙතින් ලැබෙන පිලිතුර බලාපොරොත්තු වීම හා සතියක් ඇතුලත එය නොලැබුනොත් ඒ පිලිබඳව 0777 254174 දුරකථන අංකයෙන් විමසීම.
4. ඔබේ ටීෂර්ටය සූදානම් බව අප විසින් දැන්වූ පසු අප සඳහන් කරන ස්ථානයට (කොළඹ නගරයේ) පැමිණ ඔබේ payment slip එක හෝ ජාතික හැඳුනුම්පත ඉදිරිපත් කර එය ලබාගැනීම. තැපෑලෙන් ගෙන්වාගැනීමට අවශ්‍ය නම් ඒ සඳහා අමතරව ගෙවිය යුතු තැපැල් ගාස්තු පිලිබඳව අප සමග සාකච්ඡා කිරීම.

මේ සම්බන්ධයෙන් ඔබට යම් ගැටලුවක් ඇත්නම් එය admin@sinhalabloggers.com වෙත යොමුකරන්න.

සිංහල බ්ලොග්කරුවන්ගේ සංසදයේ වාර්ෂික හමුව මෙවර දෙසැම්බර් මස පැවැත්වෙන බව අප ඔබට කලින් දැනුම් දුන්නා. සහභාගීත්වය සටහන් කරන ලෙස අප ලබාදුන් පෝර්මය මේ වන විට විශාල සංඛ්‍යාවක් පුරවා තිබෙනවා. මේ අනුව සිංහල බ්ලොග්කරුවන්ගේ සුහද හමුව පැවැත්වීමට මේ වන විට අප ස්ථානයක් සූදානම් කර අවසන්.

මෙවර සිංහල බ්ලොග්කරුවන්ගේ සුහද හමුව වෙනුවෙන් පූර්ණ අනුග්‍රහය සපයන්නේ මයික්‍රොසොෆ්ට් (ශ්‍රී ලංකා) සමාගම බව සතුටින් යුතුව දන්වන්න කැමතියි. ඔවුන් අප වෙනුවෙන් රැස්වීමට ස්ථානයක් සහ සංග්‍රහ කටයුතු සූදානම් කරදීමට කැමැත්ත පලකොට තිබෙනවා.

මේ අනුව දෙසැම්බර් මස 19 වෙනි ඉරුදිනයේ උදෑසන 8.30ට අපගේ දෙවැනි සිංහල බ්ලොග්කරුවන්ගේ හමුව කොළඹ 02 නවම් මාවතේ DHPL ගොඩනැගිල්ලේ 3වැනි මහලේ පිහිටි ශ්‍රවණාගාරයේදී පැවැත්වෙනු ඇති. අප බලාපොරොත්තු වන්නේ දහවල් 1.30 වනතුරු අපගේ හමුව පැවැත්වීමටයි. මෙහිදී ඔබට ඔබේ ප්‍රියතම බ්ලොග්කරුවන් හමුවීමට, කතාබහ කිරීමට, අදහස් හුවමාරුකරගැනීමට මෙන්ම සිංහල බ්ලොග්කරුවන්ගේ සංසදය මේ දක්වා සාක්ෂාත් කරගත් අරමුණු හා අනාගත අරමුණු පිලිබඳව සාකච්ඡා කිරීමට හැකියි. සිංහල යුනිකේතයේ ප්‍රවර්ධනය වෙනුවෙන් මයික්‍රොසොෆ්ට් ආයතනය සිදු කර ඇති කාර්යභාරය පිලිබඳව එහිදී ඔවුන් විසින් අප වෙත කෙටි දැනුවත් කිරීමක් සිදු කරනු ඇති.

පැවැත්වෙන ස්ථානය පිලිබඳ විස්තර සාරාංශගත කර මෙලෙස නැවත සඳහන් කරන්නම්,
දිනය: 2010 දෙසැම්බර් 19 ඉරිදා
වේලාව: පෙ.ව. 8.30 – ප.ව. 1.00
ස්ථානය: කොළඹ 2 නවම් මාවතේ DHPL ගොඩනැගිල්ලේ තෙවැනි මහලේ පිහිටි ශ්‍රවණාගාරයේ.

සිතියම:

විස්තර සහිත සිතියම සඳහා මෙම යොමුවට යන්න.

ඔබ සැමගේ සහභාගීත්වය එදිනට ගෞරවයෙන් අපේක්ෂා කරනවා.

ගමන් මාර්ගය: පිටකොටුවේ දුම්රියපොල ඉදිරිපිටින් මොරටුව (100) හෝ පානදුර (101) බසයක නැග, නවලෝක රෝහල අසලින් බසින්න. මදක් ඉදරියට ඇවිද එන විට පාරේ දකුණු පසින් සම්පත් බැංකු ප්‍රධාන ගොඩනැගිල්ල අසලින් (බේරේ වැව අසබඩ) නවම් මාවත ආරම්භ වේ. ඉතිරි විස්තර සිතියමෙන් දැකගත හැකියි.

පසුවදන: පසුගියවර හමුවේදී නිර්ණාමික/ආරූඪ නාම වලින් පෙනී සිටින බ්ලොග්කරුවන්ට තැනක් නොලැබුනු බවට රාවයක් පලවුනා. නිර්ණාමික බ්ලොග්කරුවන්ට හමුවට සහභාගී වීමට හා එහිදී තම ආරූඪ නාමයෙන් පෙනී සිටීමට කිසිදු බාධාවක් නැහැ. නමුත් ඔවුන් සිය මුහුණ පෙන්වීමටද අකමැතිනම් ඒ සඳහා වෙනත් විසඳුමක් නැහැ, හමුවට සහභාගී නොවීම හැර. යමෙක් එසේ රූපයෙන්ද සැඟවී සිටීමට අදහස් කරනවානම් එවැන්නෙකුට පොදු හමුවක් සුදුසු නැති බවයි අපේ හැඟීම. කෙසේ වෙතත් නැවතත් සඳහන් කරන්න කැමතියි නිර්ණාමික බ්ලොග්කරුවන්ට හමුවට සහභාගී වීමට හා එහිදී තම ආරූඪ නාමයෙන් පෙනී සිටීමට කිසිදු බාධාවක් නැති බව. අප හෝ වෙනත් කිසිදු බ්ලොග්කරුවෙක් ඔවුන්ගේ සැබ අනන්‍යතාවය ඇවිස්සීමට නොයන බව අපට විශ්වාසයි.

සැ.යු: ඔබට යම්කිසි ගැටලුවක් ඇතිනම් 0777 254174 යන දුරකතන අංකය ඔස්සෙ විස්තර දැනගත හැක. දැනට ලියාපදිංවි නොවුවන් සිටීනම් කරුණාකර මෙම පුරුක ඔස්සෙ ලියාපදිංවි වන මෙන් කාරුණිකව ඉලා සිටිනවා. හමුව පවත්වන ගොඩනැගිල්ලට කරදරයකින් තොරව ඇතුල්වීමට මෙය රුකුලක් වනු ඇත.

බ්ලොග් ලියමින්, අනිත් අයගේ බ්ලොග් කියවමින්, ප්‍රතිචාර දක්වමින්, අන්තර්ජාලය තුලදී පමණක් මුණගැහුණු සිංහල බ්ලොග්කරණ ප්‍රජාව හැබැහින් හමුවී කතාබහ කිරීමේ චාරිත්‍රය මුලින්ම ඇරඹුනේ පසුගිය වසරේ. මේ අනුව 2009 දෙසැම්බර් මස 19 වෙනි දින කොළඹ එක්සෙල් වර්ල්ඩ් හි රැස්වූ බ්ලොග්කරණ ප්‍රජාව එහිදී කලින් ජාලය තුලදී පමණක් හඳුනාගෙන සිටි අය හැබැහින් දැකබලාගෙන හඳුනාගෙන කතාබහ කිරීමේ භාග්‍යය උදාකරගත්තා.

2009 සුහද හමුවේදී...

මෙම චාරිත්‍රය ඉදිරියටත් ගෙන එනු වස් මේ අවුරුද්දෙත් සිංහල බ්ලොග්කරුවන්ගේ සුහද හමුවක් සංවිධානය කිරීමේ කටයුත්තට සිංහල බ්ලොග්කරුවන්ගේ සංසදය උරදීමටයි සැරසෙන්නේ. මෙවරත් දිනය වශයෙන් බොහෝ දෙනෙකුට අපහසුවක් නැති බව පෙණුනු දෙසැම්බර් 19 වෙනි ඉරිදා දිනය තෝරාගත්තා. මෙම අවස්ථාවට සිංහල බ්ලොග් ලියන, කියවන හැමෝටම සහභාගී වෙන්න පුලුවන්.

මෙවර හමුව පැවැත්වෙන ස්ථානය තීරණය කිරීම සඳහා අපට හමුව සඳහා කෙතරම් පිරිසක් සහභාගී වේද යන්න දළ වශයෙන් දැනගැනීමට අවශ්‍යයි. (හමුව සිදුකරන්නේ කොළඹ නගරය තුල ස්ථානයකයි, පසුගිය වසරේ එක්සෙල් වර්ල්ඩ් තෝරාගත්තා මෙන්) මේ සඳහා හමුවට සහභාගී වීමට අපේක්ෂා කරන අපගේ සහෘදයන් පහත පෝර්මය පුරවා ඒ සඳහා සහයෝගය දෙනු ඇතැයි අප අපේක්ෂා කරනවා.

පෝර්මය වෙත >>

ඉංජිනේරුවකු, දහස් සංඛ්‍යාත සිසු පිරිසක් බිහිකල කෘතහස්ත ගුරුවරයකු මෙන්ම සිංහල බ්ලොග්කරුවකු වූ කුමුදු ලාල් පින්තු මහතා ඊයේ අභාවප්‍රාප්ත විය. එතුමාගේ නික්ම යෑම පිලිබඳව සියලු සිංහල බ්ලොග්කරුවන් වෙනුවෙන් සිංහල බ්ලොග්කරුවන්ගේ සංසදයේ සාතිශය සංවේගය මෙසේ පලකර සිටින්නෙමු.

එතුමා ලියූ බ්ලොග් අඩවිය වන “තම තම නැණ පමණ“ වෙත පහත යොමුවෙන් පිවිසිය හැකිය.

http://kumudupinto.wordpress.com/

දේහය තැන්පත් කර ඇති එතුමාගේ කොළොන්නාවේ නිවසට යන මාර්ගය පහත සිතියමේ දැක්වේ.

Update:
කුමුදු ලාල් පින්තු මහතාගේ දේහය පිලිබඳව අවසන් කටයුතු 28 වැනි බදාදා සවස කොලොන්නාව පොදු සුසාන භූමියේදී පැවැත්වෙනු ඇත.

දැනට සති කීපයක සිට විවිධ බ්ලොග් වල, සිංහල බ්ලොග්කරුවන්ගේ සංසදයේ පරිපාලකයන්ගේ නම් වලින් වෙනත් පුද්ගලයන් විසින් කමෙන්ට් දමමින් සංසදයේ පරිපාලනමය තීරණ පිලිබඳ වැරදි මත පතුරවන බව ආරංචි වී ඇත.

සිංහල බ්ලොග්කරුවන්ගේ සංසදයේ පරිපාලනයම තීරණ පිලිබඳ කිසිදු පරිපාලකයකු විසින් බ්ලොග් අඩවි වල කමෙන්ට් හරහා පිලිතුරු දෙනු නොලබන අතර ඒ පිලිබඳව පරිපාලකයන්ගේ මතය ප්‍රකාශ වනුයේ පරිපාලක වරුන් (admin[at]sinhalabloggers[dot]com) හා ඔබ අතර හුවමාරු වන විද්‍යුත් ලිපි වල හෝ සිංහල බ්ලොග්කරුවන්ගේ සංසදයේ ගූග්ල් සමූහයේ ලිපි තුල පමණි.

යම් බ්ලොග් අඩවියක අප පරිපාලකයකුගේ නමින් පලවූ, සංසදයේ තීරණ හෝ නීති රීති පිලිබඳ අර්ථ දැක්වීම් අඩංගු කමෙන්ටුවක් වේ නම් එය බොහෝ විට වෙනත් පුද්ගලයකු යෙදූ ව්‍යාජ කමෙන්ටුවක් විය හැකිය. එබඳු කමෙන්ටු වල අඩංගු දේ සම්බන්ධයෙන් සංසදය වගකීමට බැඳී නොසිටී. කෙසේ වෙතත් ඔබට එම කමෙන්ටු සම්බන්ධයෙන් යම් සැකයක් ඇත්නම් පරිපාලකයන්ගෙන් ඒ සම්බන්ධයෙන් විමසා සිටීම වඩාත් සුදුසුය.

සිංහල බ්ලොග්කරුවන්ගේ සංසදය මගින් සංවිධානය කරනු ලබන සිංහල බ්ලොග් මැරතන් පිලිබඳව දිනය සම්මතයකට පැමිණ ස්වල්ප දිනකට පසුව “ලාංකීය සිතුවිලි” බ්ලොග් කියවනයේ ඇඩ්මින් කෙනෙකු වන වැප් නිශාන්ත මහතා විසින් කාලිංගගේ පෞද්ගලික ඊමේල් ලිපිනයට ලිපියක් එවමින් විමසා සිටියේ මැරතන් අවස්ථාව තම බ්ලොග් කියවනයේද සින්ඩිකේට් කිරීමට ඉඩ ලබාදෙන ලෙසයි. මෙතෙක් එවැන්නක් සිදුකර නැති හා එය නිල ඉල්ලීමක් නොවූනමුත් ලාංකීය සිතුවිලි හා අප අතර ඇති සුහදතාවය මත ඒ සඳහා අප විසින් එකඟතාවය පල කරන ලදී.

අවුරුදු නිවාඩුවෙන් පසුව කාටත් ඇතිවූ වැඩ රාජකාරි අධික තත්වය තුල මැරතන් සින්ඩිය නිර්මාණය කිරීමේ කටයුතු අප විසින් නිම කරනු ලැබුවේද මැරතන් දින (24) සවස්  වන විටය. ගූග්ල් සමූහයේද මැරතන් පිලිබඳව අප විසින් කිසිදු සඳහනක් කරනු නොලැබුවේ මෙම අවිවේකී තත්වය තුලය. මේ නිසා ලාංකීය සිතුවිලි ‍සොයුරන් වෙත මැරතන් බ්ලොග් වල ෆීඩ් එක ලබාදීමද ප්‍රමාද විය.

මේ සිදුවීම හුවා දක්වමින් අද දින මැරතන් අතරතුර චතුරංග රූපසිංහ නම් ලාංකීය සිතුවිලි වලට සම්බන්ධ පුද්ගලයකු විසින් ලියූ ලිපියක සඳහන් වනුයේ අප විසින් ඔවුන්ගේ මැරතන් විකාශය කඩාකප්පල් කිරීම සඳහා සිදුකල කුමන්ත්‍රණයක් බවය.

කුමන්ත්‍රණ කිරීමට කිසිදු අවශ්‍යතාවයක් නොමැති බවත්, ලාංකීය සිතුවිලි විසින් මැරතන් බ්ලොග් අඩවි සින්ඩිකේට් කිරීමට අප නොකැමති නම් අපට කලයුතුව තිබුනේ ඔවුන්ගේ ඉල්ලීම ප්‍රතික්ෂෙප කිරීම බවත් කිව යුතුය. මැරතන් අවස්ථාව සංවිධානය කරන්නේ අප විසින් වන බැවින් ඒ සඳහා අප හට අයිතියක් ඇත. පෞද්ගලික ඉල්ලීමක් මත වුවද අප විසින් ඒ සඳහා අනුමැතිය පල කලේ “මනුස්සකම” නිසා මිස වෙනත් යමක් නිසා නොවේ. එම මනුස්සකම වෙනුවෙන් අප අපට හැකි ආකාරයට ඔවුන් හා සහයෝගයෙන් ක්‍රියා කිරීමට කටයුතු කරන ලදී.

චතුරංග රූපසිංහ නැමැත්තා එය තම පුද්ගලික අදහසක් ලෙස හුවාදක්වන්නට උත්සාහ කරත් එය ලියා ඇති ස්වරූපයෙන් අපට හැඟීයන්නේ එය ලාංකීය සිතුවිලි හා සම්බන්ධ හැමගේ අදහසක් ලෙසිනි. මෙවැන්නක් අප කිසිදිනෙක ලාංකීය සිතුවිලි වෙතින් බලාපොරොත්තු නොවූයෙමු. අපට පෙනී යන ආකාරයට ඔවුන්ට අවශ්‍ය වී ඇත්තේ ඔවුන් පුන පුනා කියන ආකාරයට “SBU සමග සහයෝගීත්වයෙන් වැඩකිරීම” නොව “SBU වලට කෙළවීම” බවය. තම අඩවියේ හිට්ස් වැඩිකරගැනීමට මෙවැනි ක්‍රියාමාර්ග ගන්නා චතුරංග වැනි පටු අදහස් ඇති පුද්ගලයන් ලාංකීය සිතුවිලි සමග සිටීම කෙරෙහි කණගාටුව ප්‍රකාශ කරමු.

යම්හෙයකින් චතුරංග විසින් සිදුකරන ලද මෙම ක්‍රියාවට ලාංකීය සිතුවිලි හි අනෙකුත් වගකිවයුත්තන් සම්බන්ධ නැතිනම් අපට කීමට ඇත්තේ චතුරංග වැනි වගකීමක් නැතිව ක්‍රියාකරන පුද්ගලයන් නිසා ඔබේ අඩවියට සිදුවන හානිය අතිමහත් බවය.

ඔබ මෙතෙක් දවස් පුල පුලා බලා සිටි සිංහල බ්ලොග් (මිනි) මැරතන් ඉසවුව අද (24) රාත්‍රී 8 සිට හෙට (25) උදෑසන 8 දක්වා පැවැත්වීමට මේ වන විට සියලු කටයුතු සූදානම් කර අවසන්. මේ සැරසෙන්නේ මැරතන් ඉසවුව හා සම්බන්ධ වැදගත් නිවේදන කීපයක් නිකුත් කිරීම සඳහායි.

• ඉසවුව නැරඹීමට එක්වන අයට ඒ අවස්ථාව වන විට http://marathon.sinhalabloggers.com ලිපිනයේ ඇති මැරතන් සින්ඩිකේටරය හරහා එය නැරඹිය හැකියි.
• සජීවී රේඩියෝවට සවන්දීමට හා චැට් කාමරය සඳහා එක්වීමට http://techkatha.com/chat/ වෙත යන්න.
• චැට් සඳහා password අනවශ්‍යයි. ඔබට කැමති nickname එකක් පමණක් ලබාදී Connect එබීම සෑහේ.
• සජීවී රේඩියෝව (වෙබ් පිටුවේදී නොව) ඔබේ ප්‍රියතම මීඩියා ප්ලේයරයෙන් ඇසීමට කැමති අය පමණක්, Windows Media Player සඳහා මෙම ගොනුවද, Winamp, iTunes, VLC, jetAudio, Totem හෝ වෙනත් ප්ලේයර සඳහා මෙම ගොනුවද බාගත කරගෙන අදාල ප්ලේයරයෙන් විවෘත කරගත හැකියි. (අනිත් අයට වෙබ් පිටුව තුලින්ම රේඩියෝවට සවන් දිය හැකියි)
• චැට් කිරීම සඳහා වෙබ් පිටුව නොව IRC client software එකක් භාවිතා කරන අය පමණක් ඒ සඳහා මෙම විස්තර යොදාගන්න. (අනිත් අයට වෙබ් පිටුව තුලදී කිසිදු අවහිරයකින් තොරව චැට් කාමරය වෙත එක්විය හැකියි)
  • IRC Server: irc.geekshed.net
  • Channel: #techkatha

මැරතන් සින්ඩිකේටරය, සජීවී රේඩියෝව මේ මොහොතේ ක්‍රියාත්මක නොවන බවත්, එය ආරම්භ වන්නේද ඉසවුවේ ආරම්භය සමගම බවත් කරුණාවෙන් සලකන්න. මේ සම්බන්ධයෙන් ඔබට යම් ගැටලුවක් ඇතිවේනම් වහාම admin[at]snhalabloggers[dot]com ඊමේලය හරහා අප අමතන්න.

මැරතන් ඉසවුව සඳහා මේ වන විට සහභාගී වන බ්ලොග් අඩවි/නම් මෙසේයි. මැරතන් සඳහා ලියාපදිංචි කර ගැනීම අද සවස 6න් අවසන් වන නිසා ඔබ මැරතන් දිවීමට බලාපොරොත්තු වනවානම්, තවමත් මැරතන් සඳහා ලියාපදිංචි වී නැත්නම් දැන්ම ලියාපදිංචි වන්න.

එසේනම් මැරතන් ඉසවුව සමග අද රාත්‍රී 8ට හමුවෙමු.

සාමයෙන් සහෝදරත්වයෙන් එකිනෙකා බැඳෙන

බත බුලතින් සපිරි සෞභාග්‍යමත් සමයක

වැඩි වැඩියෙන් සිංහල බ්ලොග් ලියැවෙන

සුභ අලුත් අවුරුද්දක් වේවා යැයි

ඔබ සැම වෙත ප්‍රාර්ථනා කර සිටිමු

—